افغان حکومت: که طالبان اوربند وغځوي موږ هم ورته چمتو یو

افغان حکومت وایي، دوی هیڅکله د اوربند خلاف نه و او که چېرته طالبان اوربند وغځوي نو دوی هم ورته چمتو دي. دا څرګندونې د ملي امنیت شورا ویاند جاوید فیصل نن په کابل کې یوې خبري ناستې ته کړې دي. نوموړي زیاته کړې، مذاکرات، اوربند او د بندیانو ازادول سره تړلي دي او ټول باید یو ځای مخې ته بوتلل شي. فیصل ویلي، د طالب بندیانو ازادول د سولې خبرو د پیل هڅه ده. هغه د خپلو خبرو پر دوام څرګنده کړې، طالبانو خپلې ژمنې نه دي عملي کړې او په خبره یې، حکومت غواړي چې اوربند وغځول شي، څو د بندیانو ازادولو او تاوتریخوالي کمښت په موخه ډاډ ترلاسه شي.