امریکا او د اسلامي همکاریو سازمان د افغانستان پر وضعیت خبرې کړې دي. د راپورونو له مخې د امریکا د بهرنیو چارو وزیر انتوني بلینکن په واشنګټن کې د اسلامي همکاریو سازمان له مشر سره کتلي دي. په دې لیدنه کې دواړو لورو د ګڼو نورو نړیوالو مسئلو تر څنګ د افغانستان په اړه هم خبرې کړې دي.
بلینکن له طه سره په دې لیدنه کې ویلي چې دوی په افغانستان کې د بشري حقونو د تامین غوښتونکي دي. دواړو لورو ټینګار کړی چې د افغانستان نوی حکومت دې پر خپلو کړو ژمنو عمل وکړي او له نړیوالې ټولنې سره دې تعامل ته ادامه ورکړي. امریکا تر دې وړاندې هم غوښتي چې افغانستان کې باید بشري حقونه رعایت شي او نجونې او ښځې دې د زده کړو حق ولري.
