کونړ کې د ځمکې پر سر د شخړې له امله درې وروڼه وژل شوي

کونړ کې د یوې کورنۍ د غړو ترمنځ د یوې خونې د ملکیت پر سر شخړه کې درې وروڼه ووژل شوي دي. د کونړ د والي ویاند عبدالغني مصمم وايي، چې د خاص کونړ ولسوالۍ د منګوال په سیمه کې د تره زامنو ترمنځ د کور د یوې خونې د ملکیت پر سر شخړه شوې. نوموړی زیاتوي، ددې لانجې پرمهال ډزې شوي چې له امله یې د یوه لوري درې وروڼه وژل شوي دي. مصمم وایي، سیمه له ولسوالۍ لرې ده او هلته د پولیسو تر رسېدو مخکې قاتلین تښتېدلي، خو پولیسو یو شکمن کس نیولی او د نورو د نیولو هڅې یې پیل کړې دي.