هندي پلاوی وایي په افغانستان کې یې دفترونه او پروژې خوندي دي. کابل ته د هند د راغلي پلاوي غړو له رسنیو سره په خبرو کې ویلي، د افغان حکومت له چلند ښکاري چې دوی له نړۍ سره د پراخو اړیکو غوښتونکي دي.
د دوی په خبره په کابل کې یې له خپل سفارت او ځینو پروژو لیدنه کړې ده او دا ورته ثابته شوې ده چې هر څه پر خپل ځای دي، سفارت خوندي دی او د هند بشپړې او نابشپړې پروژې خوندي ساتل شوې دي. هندی پلاوی وایي دوی ته همدا راز معلومه شوې چې افغانستان په ډېرو برخو کې پراخو مرستو ته اړتیا لري او نړیوالې ټولنې ته په کار ده چې له دغه هېواد سره د روغتیا، زده کړو، اقتصاد او اوبو رسوونې په برخه کې همکاري ډېره کړي.
