امریکا د یو میلیارد ډالرو په ارزښت نظامي تجهیزات اوکراین ته لېږي

یورو نیوز راپور ورکړی دی چې امریکا له اوکراین سره د بېسارې نظامي تجهیزاتو ورکړې ژمنه کړې ده او ډېر ژر به یې د اوکراین په واک کې ورکړي. راپور کې راځي چې جوبایډن له ولادیمیر زلینسکي سره په وروستۍ تلیفوني مکالمه کې ژمنه کړې ده چې امریکا به د یو میلیارد ډالرو په ارزښت نظامي تجهیزات اوکراین ته ورکړي. بایډن تر یادې ټلفوني مکالمې وروسته په یوه بیانیه کې ویلي وو چې اوکراین ته به د نظامي تجهیزاتو بسته کې درنې وسلې، ساحلي دفاعي وسلې او بېلابېل نور نظامي تجهیزات شامل وي. بایډن دغه راز د اوکراین له خلکو سره د ۲۲۵ میلیون ډالرو په ارزښت د بشري مرستو ژمنه هم کړې ده چې تر ډېره حده به د اوکراینیانو لومړني ضرورتونه حل کړي.