د هېواد په ګڼو ولایتونو کې د سیلابونو راوتلو مالي او ځاني زیانونه اړولي دي. طبیعي پېښو ته د رسیدګۍ په برخه کې د دولت وزارت مرستیال مولوي شرف الدین مسلم وایي، د هېواد په اتو ولایتونو کې د وروستیو ورښتونو له امله سیلابونه راوتلي چې له امله یې لس کسه وژل شوي او دوه نور ټپیان دي.
هغه همدا راز وايي چې په دې سیلابونو کې د خلکو کورونه هم ویجاړ شوي چې شمېر یې پنځه سووه کوره ښيي. مسلم دغه راز وایي چې سیلابونو لسګونه کیلومتره سړک هم ویجاړ کړی دی او د شاوخوا ۳۵۰۰ جریبه زراعتي ځمکې حاصلاتو ته یې زیان اړولی دی. سیلابونو د کروندګرو د ځمکو تر څنګ ددوی حیوانات هم تلف کړي دي.
