د افغانستان لپاره د ملګرو ملتونو مرستیال استازي د بهرنیو چارو له سرپرست وزیر امیرخان متقي سره کتلي دي. نوموړی چې دمګړی د یونما ددفتر سرپرست هم دی، وايي چې په افغانستان کې به د ملګرو ملتونو د بریالي ماموریت لپاره هڅه کوي. مارکس پوتزل د خپل ماموریت په تړاو امیرخان متقي ته معلومات ورکړل او له افغان حکومت یې غوښتي چې په دې برخه کې ورسره همکاري او همغږي وکړي. پوتزل تازه په افغانستان کې د ملګرو ملتونو د استازولۍ سیاسي مرستیال ټاکل شوی دی او تر څنګ یې دمګړی ددغه استازولۍ د سرپرستۍ دنده هم مخ ته وړي.
