د بشري حقونو څار سازمان د یوې ویډيو په خپرولو سره افغانستان کې له شپږم ټولګي پورته د نجونو د ښوونځیو پر تړلي پاتې کېدو اندېښنه څرګنده کړې ده. یاد سازمان ویلي، نږدې ۳۰۰ ورځې کېږي چې افغان نجونې ښوونځیو ته نه دي تللي او د دې وضعیت دوام به نجونو، کورنیو او د هېواد راتلونکي ته ویجاړوونکې پایلې ولري. په همدې حال کې د هېواد پخواني ولسمشر حامد کرزي هم په وار وار د ښوونځیو پر پرانیستل کېدو ټینګار کړی دی او له ا.ا څخه یې غوښتنه کړې ده چې هر څه ژر ټول ښوونځي د نجونو پر مخ پرانیزي. ا.ا که څه هم تازه څه غبرګون نه دی ښودلی خو وړاندې تر دې یې ویلي چې د نجونو د ښوونځیو د پرانیستلو لپاره یې مشورې روانې دي خو د ۳۰۰ ورځو په تېرېدو هم کومې پایلې ته نه دي رسېدلي.
