د ملي انکشاف شرکت وایي د شاوخوا ۶۹۲ پروژو د تطبیق چاره یې پيل کړې ده. د ملي شرکت مسوولانو ملت ته حساب ورکولو په پروګرام کې د خبرو پر مهال ویلي چې دوی خپلو فعالیتونو ته ادامه ورکړې ده او هڅه کوي په هېواد کې ګټورې پروژې تطبیق کړي. سرچینه وایي چې دوی د شاوخوا ۶۹۲ پروژو تطبیق پيل کړی دی چې پر دې ټولټال ۱۱۲ میلیارده افغانۍ لګښت راځي. دوی همدا راز زیاتوي چې دغه شرکت توانېدلی چې روان کال خپل شاوخوا ۱،۲ میلیارده افغانۍ پورونه خلاص کړي. د ملي انکشاف شرکت په مخکیني حکومت کې جوړ شو چې حکومتي اداراتو به اړینې او بېړنۍ پروژې په چټکۍ سره ددې شرکت پر مټ عملي کولې. نوي حکومت هم ددغه شرکت د فعال ساتلو ژمنه کړې ده.
