د چين د دولتي شورا د تايوان چارو دفتر او د دې شورا مطبوعاتي ادارې د اګست په لسمه نېټه ((د تايوان مسئله او په نوې زمانه کې د چين د يووالي چارې)) په عنوان سپين کتاب خپور کړی او پکې يې يو ځل بيا پر دې ټينګار کړی، چې تايوان د چين يوه نه بېلېدونکې برخه ده.
په دغه سپين کتاب کې د ملي يووالي په پار د چين کمونېست ګوند او خلکو ټينګ هوډ او اراده څرګنده شوه او په نوې زمانه کې د ملي يووالي د پرمخبېولو په اړه د چين د کمونېست ګوند او حکومت دريځ او اقدامات بيان شوي دي.
همدارنګه دغه کتاب هغه پيغام خپور کړی، چې د تايوان مسئله د چين کورنۍ مسئله ده او د دغه هېواد له مهمو ګټو او د چينايانو له ملي احساساتو سره تړاو لري، او هېڅ بهرنی لوری بايد پکې لاسوهنه ونه کړي.
په داسې حال کې، چې د امريکا د استازو جرګې مشرې نانسي پېلوسي څه موده مخکې تايوان ته سفر وکړ، چې له امله يې د دې سيمې وضعيت ترینګلی شو او د چين او امریکا ترمنځ شخړه لاشديده شوې ده، چين د ياد سپين کتاب په خپرولو سره نړيوالې ټولنې ته د تايوان مسئلې په اړه هراړخيز معلومات ورکړي او د ((يو هېواد او دوه نظامونه )) پاليسۍ په رڼا کې يې د سوله ييز واحد چين نقشه بيان کړې ده. د دغه سپين کتاب خپرول نه يوازې تايوان ته د پېلوسي د سفر په غبرګون کې د چين قوي ځوابي اقدام دی ، بلکې د تايوان مسئلې د هوارولو په موخه د چين عمومي کړنلاره ترې ښکاره شوې او د اسيا او ارام سمندر سيمې او نړۍ سمسورتيا او ثبات ته يې مثبته انرژي ورکړې ده.
د يو چين پېژندنې اصل څه ډول اصل دی؟ دغې پوښتنې ته يوازينی ځواب دا دی : په نړۍ کې يوازې یو چين شته، تايوان د چين نه جلاکېدونکې برخه ده او د چين ولسي جمهوریت په نړۍ کې د چين په استازيتوب يوازينی قانوني حکومت دی. دغه اصل له نورو هېوادونو سره د چین د اړيکو سياسي بنسټ او په ډېرو نړيوالو سندونو کې پېژندل شوی دی. د ۱۹۴۳م کال د قاهرې په اعلاميې او د ۱۹۴۵م کال د پوتسدام په اعلاميې کې په څرګنده توګه تسجیل شوی چې چين د تايوان ملي حاکميت لري.
په ۱۹۷۱م کال کې د ملګرو ملتونو په ۲۶مه اسامبله کې تصويب شوی ۲۷۵۸م پرېکړه ليک هم د يو چين پېژندنې اصل بیان کړی دی. له هغه وروسته، چې پېلوسي تايوان ته سفر وکړ، ۱۷۰ هېوادونو او ډېرو نړيوالو سازمانونو له چين ملاتړ او د يو چين پېژندنې پر اصل ټينګار څرګند کړی دی.
د تايوان مسئله د چين د کورنۍ جګړې له امله رامنځته شوې او تراوسه نه ده هواره شوې او تر ټولو لوی لامل يې د امريکا مداخله ده. که څه هم امريکا له چين سره په دريو ګډو اعلاميو کې د يو چين پېژندنې اصل منلی، خو په عمل کې يې دغه اصل نه دی رعايت کړی. امریکا له چين سره د سياسي اړیکو له جوړېدو وروسته له تايوان سره د اړيکو قانون نافذ کړی او تایوان ته يې شپږ ژمنلیکونه ورکړي او غوښتي يې چې له دې لارې د تايوان له بېلتونپالو سره د غیر قانوني اړيکو لپاره پلمه پيدا کړي او د چين پر وړاندې لمسون کوونکې کړنې ترسره کړي.
په دې وروستيو کلونو کې امریکا د يو چين پېژندنې اصل د نقض په موخه ښکاره اقدامات کړي دي، څو د یو چين د شتون پروړاندې خنډونه جوړ کړي. د بېلګې په توګه پر تايوان يې وسلې پلورلې، په نړيوالو مواردو کې يې د تايوان تمثيل ته زمينه برابره کړې او پېلوسي ته يې، تايوان ته د سفر اجازه ورکړې ده.
ويل کېږي چې امريکا د تايوان تنګي د سولې او ټیکاو تر ټولو لوی ورانکاری لامل دی.
د چين کمونېست ګوند د دغه هېواد د واکمن ګوند په توګه تل د تايوان د مسئلې هوارول او د هېواد واحدول خپلې مهمې دندې ګڼي. په ياد سپين کتاب کې د نوي چين له جوړېدو راهيسې د هېواد د واحدولو په موخه د چين د کمونېست ګوند لويې هڅې ثبت شوې دي. د بېلګې په توګه د ۲۰۱۷م کال په اکتوبر کې د دغه ګوند نولسم ملي کانګريس د ((يو هېواد او دوه نظامونه)) پر پاليسۍ د ټينګار او د هېواد د واحدولو اساسي کړنلاره وټاکله. د دغه ګوند د مرکزي کمېسيون عمومي منشي شي جين پینګ د ۲۰۱۹م کال په جنورۍ کې د تايوان وطنوالو ته د پيغام د خپرېدو د ۴۰مې کليزې يادغونډې ته مهمه وينا وکړه، چې په نوې زمانه کې يې د تايوان تنګي د دواړو غاړو د اړیکو د سوله ييز پرمختګ او د هېواد د سوله يیز واحد بهیر لپاره يې سمه لاره ښودلې ده.
((د تايوان مسئله او د نوې زمانې د چين د یووالي چارې)) سپين کتاب په لومړي ځل د ((يو هېواد او دوه نظامونه)) پاليسۍ په رڼا کې د تايوان تنګي د دواړو غاړو د سوله ييز واحد نقشه پنځولې، چې له مخې به يې تايوان د پرمختګ لاپراخې فضا ته لاسرسی ولري، د اوسېدونکو حقه حقونه به يې په لاښه توګه تضمين شي، د چيني ملت سمسور پرمختګ ته به زیاتې زمينې برابرې شي او د اسيا او ارام سمندر سيمې او نړیوالې ټولنې سوله او پرمختګ به په لاښه توګه وساتل شي.
د چينايانو په چارو کې باید د چينايانو لخوا پرېکړه وشي. يو میليارد او څلور سوه ميليونه چينايان غواړي، چې د چين د کمونېست ګوند تر مشرۍ لاندې د واحد سوله ييز هېواد لپاره پراخه فضا جوړه کړي او د تايوان بېلتونپالو ته هېڅ فضا نه ورکوي. چینايان د خپل هېواد د ملي حاکميت او ځمکنۍ بشپړتيا د ساتلو لپاره ټینګه اراده، هوډ او پياوړی توان، همدارنګه پوهه، بصيرت او جرئت لري. هغه کسان چې د امریکا پر مټ له چین څخه د تایوان جلا کول او له تايوان څخه په کار اخيستنې د چين مخه نيول غواړي، بايد ياد سپين کتاب په دقت ولولي.