چين ميډيا ګروپ د ټپي په نوم مستند فلم جوړ کړی او د اګست په ۱۴مه نېټه یې په کابل کې نندارې ته وړاندې کړی دی.
په دغه فلم کې د افغانانو ژوند ته کتنه شوې او رېښتینی ژوند يې پکې انځور شوی دی.
د کابل پوهنتون استادان عبدالرحمن عثماني او محمد حامد همدرد هم د ياد فلم نندارې ته ورغلي او د چین ميډیا ګروپ له خبریالې سره يې په مرکې کې د ياد فلم په اړه خبرې کړې دي.
استاد عبدالرحمن وايي، چې مونږ تېره ورځ د ټپي په نوم مستند فلم وليده او په ليدلو يې د هر انسان زړه درديږي.
پوښتنه دا ده، چې په افغانستان کې د تروريزم په نوم ولې عام بېګناه افغانان په خپلو کورونو کې ووژل شول؟
نړيوالو د بشري مرستو په نوم له افغانستان څخه څومره پيسې بيرته يوړې؟
د افغانستان د زياترو سيمو خلکو ولې له مخکيني دولت څخه واټن ونيولو او د دې واټن په زياتولو کې ورسره چا مرسته وکړه؟
چا قصداً خلک د حکومت پر مخالفينو بدلول؟
دا او دې ورته نورې پوښتنې په دغه مستند فلم کې ځواب شوې دي.
د تروريزم په نوم د بېګناه افغانانو وژل نه بښونکی ملي او بين المللي خيانت دی، چې دا ډول پيښې يو ځل نه، بلکې په سلګونو ځلې تکرار شوې دي.
نړيوالو د بشري مرستو په نوم کمکونه کړي دي، خو افغانان ولې تر اوسه داسې اوبه څښي، چې حيوان هم ترينه ګټه اخلي؟
کومو کسانو چې له مخکني دولت څخه واټن واخېست، عامل يې بهرنيان وو، ځکه بهرنيانو په قصدي توګه د افغانانو په سر، مال او شخصي حريم تجاوزونه کول، د ډېرو افغانانو کورنۍ به يې د افغانستان په لرې پرتو سيمو کې د شپې ولړزولې او هغه خلک يې مجبور کړل، چې د خپلې آبرو او عزت په خاطر وسلې ته لاس کړي او له خپل ننګ او ناموس څخه دفاع وکړي.
استاد محمد حامد همدرد وايي، چې په ياد مستند کې يوه ډېره دردونکې کېسه انځور شوې او ډیره زړه بوږنونکی صحنه چې هغه ماشوم چې يوازې پاتې و او بل ماشوم يې لوی کولو.
په دې مستند کې داسې حقيقي څيرې ښودل شوي، چې د حقوق بشر، نړيوالو بشري مرستو، د ښځو خېريه بنسټونو په نوم ورته يوه افغانۍ هم نه ده رسيدلې .
په دې مستند کې د افغانستان اصلي څېره ښودل شوې او يو تريخ حقیقت يې پکې رانغاړلی دی او هغه څه چې د افغانستان په اړه پر نړيوالو رسنيو ښودل کيږي، ټوله عوام فریبي ده او د خلکو سترګو ته خاورې شيندي.
（作者：徐晓勤 初审：陈重 审核：席猛）