د بریتانیا لومړي وزیر بوریس جانسون په یو ویډیويي پیغام کې د بریتانیا له خلکو غوښتنه کړې ده چې په سړه سینه او قانون ته په درناوي دې د توکمپالنې پر ضد مبارزه وکړي. نوموړي زیاته کړې، د بریتانیا حکومت او خلک یې نشي کولی د جورج فلویډ پر وحشیانه وژنه سترګې پټې کړي. جانسون د خپلو خبرو پر دوام د تورپوستو ژوند مهم دی خوځښت ته په خطاب کې ویلي، هو هغوی په حقه دي، باید د خپلو حقونو د تحقق لپاره له مدني لارو مخ ته لاړ شي خو دا هر څه باید په سړه سینه او قانون ته په درناوي وي، ځکه د نوموړي په وینا که تاوتریخوالی کېږي نو دا بیا دا خوځښت لا زیانمنولی شي.
