تر راتلونکو دوو میاشتو د کانونو پر ۸ لویو پروژو کار پیلیږي

د کانونو او پټرولیم وزارت وایي، تر دوو میاشتو پورې به د کانونو پر اته لویو پروژو عملي کار پيل شي. د کانونو او پټرولیم وزارت وایي، د اته لویو پروژو د پانګونې په هدف ورسپارل شوي پروپوزلونه یا وړاندیزونه د څېړنې په حال کې دي. دغه پروژې د هرات ولایت د غوریانو د اوسپنې او د غور په شهرک او غورک ولسوالیو کې د سربو او جستو د منرالونو د کېندنې دي چې د پرخوالي له کبله په ۸ حوزو یا بلاکونو ویشل شوي دي. د کانونو وزارت ویاند عصمت الله برهان وایي، دواړو کورنیو او بهرنیو شرکتونو د دغې پانګونې د ګټلو په سیالۍ کې ګډون کړی دی. برهان وویل، تر دوو میاشتو پورې به پر دغو پروژو کار پيل او نوموړی ادعا کوي چې لسګونه زره کسانو ته به په‌کې د کار زمینه برابره شي.