د هند په لوېدیځ کې د یوې ترافیکي پېښې له امله ۱۲ تنه مسافر وژل شوي دي. هندي پولیسو ویلي، چې د مهاراشترا ایالت په ناسک ښار کې د یادې پېښې له امله ۴۳ کسان چې سخت سوځېدلي وو، روغتون ته وړل شوي دي. د راپورونو له مخې ډېری مسافر ویده وو، چې موټر یې ټکر شوی او اور یې اخیستی دی. د هند لومړي وزیر نرېندرا مودي پر یادې پېښې خواشیني ښودلې ده. هند کې هرکال د ترافيکي پېښو له امله زرګونو کسانو ته مرګ ژوبله اوړي چې زياتره ترافيکي پېښې د موټر چلوونکو د بې احتياطۍ، د سړکونو خرابوالي او د زړو موټرو له امله رامنځته کېږي.
