ترکمنستان اندخوی کې د ۱۰ کیلو متره پټلۍ جوړولو تصمیم نیسي

د افغانستان او ترکمنستان د اوسپنې پټلۍ ادارې مسوولینو په یوه ان لاين غونډه کې پر يو شمېر موضوعاتو هوکړې ته رسېدلي دي. په دې ان لاین ناسته کې چې د افغان پلاوي مشري د اوسپنې پټلۍ ادارې سرپرست ملا بخت الرحمن شرافت کوله، د اوسپنې پټلۍ اړوند ترکمنستان ته دمعرفي شويو محصلينو د پروسې پر چټکتیا، د آقینې- اندخوی ۳۰ کیلومتره اوسپنې پټلۍ د بېلونو پر اجرا کولو، له آقينې څخه تر مزارشریف ښار پورې د اوسپنې پټلۍ رسولو او د تور غونډۍ اوسپنې پټلۍ مالي حسابونو په تصفيې هر اړخیز بحثونه شوي دي. په خبرپاڼه کې راغلي، په دې ناسته کې پرېکړه وشوه چې د محصلينو د لېږلو پروسه به چټکتیا مومي، د تورغونډۍ اوسپنې پټلۍ مالي حسابونو د تصفيې لپاره به په راتلونکو ۵ ورځو کې د دواړو لوریو تخنیکي او مسلکي ټيمونه جوړيږي او راتلونکې کې به آنلاین او حضوري ناستو ته دوام ورکول کيږي. دغه راز ترکمنستاني لوري ژمنه کړې چې نږدې راتلونکې کې به يو تخنيکي ټيم اقينې ته استوي، څو له اندخوی سټېشن څخه د اندخوی مرکز ته له وړاندې ډيزاين شوې ۱۰ کیلومتره د اوسپنې پټلۍ پر جوړولو تصميم ونیسي.