پاکستان وایي د افغانستان له لارې له مسکو سره سوداګري پراخه شوې

په مسکو کې د پاکستان سفير ويلي چې د افغانستان له لارې يې له روسيې سره د هېواد سوداګري پراخه شوې ده. تاس خبري اژانس د سفير له قوله ويلي چې د هېواد سوداګريز توکي يې له ۲۵ تر ۳۵ ورځو پورې د افغانستان او منځنۍ اسيا له لارې روسيې ته رسيږي. نوموړي ويلي چې د پاکستان سوداګريز توکي لومړی د منځنۍ اسيا په هېوادونو، په ځانګړي ډول قرغيزستان او قزاقستان کې ګمرک کيږي او وروسته د مسکو په لور خوځول کيږي. د افغانستان د سوداګرۍ او پانګونې خونه هم وايي چې له افغانستانه د توکو ترانزيټ پنځوس سلنه ډير شوی دی. د دې خونې مرستيال خان جان الکوزی وايي، افغان حکومت له سويلي اسيا څخه منځنۍ اسیا ته د توکو د لېږد لپاره اړينې اسانتياوې رامنځته کړې دي. دا مهال د ازبکستان، تاجکستان، قرغيزستان، ترکمنستان، روسيې، ايران، هند او پاکستان سوداګريز توکي د افغانستان له لارې ترانزيټ کيږي.