په شانګهای کې د چين پنځم نړيوال وارداتي نندارتون د نومبر له پنځمې نېټې څخه پيل شو او د نومبر تر لسمې نيټې پورې به دوام ولري. په ۲۰۱۸م کال کې د چين د لومړي نړيوال وارداتي نندارتون له جوړېدو راهيسې پرانيستي چيني بازار لازيات نړيوال سوداګر راجلب کړي او ډېرو يې د چين په نړيوال وارداتي نندارتون کې ګډون کړی و. اوس روان 2022م کال ټولټال ۱۴۵ هېوادونو، سيمو او نړيوالو سازمانونو په دې نندارتون کې ګډون کړی او د ۱۲۷ هېوادونو او سيمو شرکتونو د تصديو په سوداګريز نندارتون کې برخه اخيستې چې په دې جمله کې ځيني افغان تصدۍ هم شاملي دي. د چين نړيوال وارداتي نندارتون نه يوازې د پرمختللو هېوادونو شرکتونو ته بلکې د ګڼو پرمختيایي هېوادونو منځنيو او کوچنيو تصديو ته سوداګريز فرصتونه برابر کړي دي.
دوه کاله دمخه افغان سوداګر علي د چين په نړيوال وارداتي نندارتون کې ګډون او نندارچيانو ته افغان غالۍ وړاندې کړې وي. روان کال هغه بيا په شانګهای کې د چين په پنځم نړيوال وارداتي نندارتون کې ګډون لري. هغه وويل چې د چين نړيوال وارداتي نندارتون يو نړيوال
ډګر ګڼل ګرځېدلی چې د نړۍ د بېلا بېلو هېوادونو تصدۍ راټول شوي او ترې سوداګريز فرصتونه موندلی شي. هغه وويل چې اوس ډېرو افغان تصديو د دې ډګر له لارې فرصت تر لاسه کړی او د دوی تر ټولو ښې غالۍ چين ته صادر کړي دي. پخوا مو دومره مناسب فرصت نه درلود، نو ډېرو چينايانو هم معلومات نه درلودل چې په افغانستان کې دومره غوره او ښه کيفيت لرونکي توليدات شته. اوس دغه نندارتون جوړ شوی او له دې لارې افغان سوداګر کولی شي چې خپل ځانګړي توليدات نندارچيانو ته وړاندې کړي. زه پر دې ډېر خوشاله يم.
په تېرو څو کلونو کې د چين او افغانستان ترمنځ د سوداګريز تګ راتګ په زیاتېدو سره ډېر افغان سوداګر هم چين ته راغلي او دلته يې کاروبار شروع کړی و. په چين کې د افغان د بوتانو د شرکت عمومي مدير تحصين اوس د فوجيان ولايت په جين جيانګ ښار کې اوسيږي او هلته د بوتانو په سوداګرۍ لګيا دی. هغه وويل چې چين زما دوهم ټاټوبی دی او دلته څو کاله ژوند او کار کړی دی. په تېرو څو کلونو کې زما په شان افغان سوداګرو واقعأ د چین له پرمختګ څخه ډېرې ګټې اخيستي او د چین له امتيازي تګلارو څخه برخمن شوي دي. کله چې د چين د ميډيا ګروپ خبريالې ور سره مرکه کړې، هغه د چين د نړيوال وارداتي نندارتون ته د تګ په تياري بوخت و. هغه په تليفوني مرکه کې ويلي چې په شانګهای کې د چين نړيوال وارداتي نندارتون د سوداګرو ميله ده. چين په نړۍ کې ډېر لوی بازار لري او د افغانستان په شمول د ډېرو وروسته پاتی شويو هېوادونو د سوداګرو لپاره پرمختيايي فرصتونه برابروي. زما په ټاټوبی لوګر ولایت کې ډېر ځانګړی توليدات هم شته، خو ځیني يې لا تر اوسه د نړيوالو له خوا نه دي پېژندل شوي. که څه هم دلته ډېر کارونه لرم او مصروف یم. خو لاهم غواړم چې دغه نندارتون له نژدې وګورم او د دغو توليداتو د بازار موندنې لپاره هڅې وکړم.
محمد ظفر نظري چې اوس د افغانستان په خوست کې د جلغوزي سوداګري کوي، په وروستيو کې چين ته د جلغوزې په ليږدولو بوخت و. هغه د چين د ميډيا ګروپ له خبريالې سره د مرکې په ترڅ کې وويل چې دغه جلغوزي د ځمکني دهليز له لارې لومړی ازبکستان ته رسېږي او بيا د الوتکې په وسيله شانګهای ته ليږدول کيږي. اوس دغه جلغوزي ښايي د شانګهای د چين پنځم نړيوال وارداتي نندارتون کې نندارې ته وړاندې شي. ارمان لرم چې يوه ورځ به په دې نندارتون کې ګډون وکړم او په خپله کتونکو ته د افغان جلغوزيو په باب معلومات وړاندې کړم. رښتيا ده چې ډېر چينايان د افغان جلغوزیوپه باب لږ معلومات لري او تل په دې نظر دي چې جلغوزي په برازيل اويا پاکستان کې توليديږي. خو حقيقت دا دی چې دغه جلغوزي د افغانستان په خوست او پکتيا ولايتونو کې د افغان بزګرانو له خوا په ډېر زحمت سره راټول شوي وو. خو ډېر وګړي پر دغه حقيقت ښه نه پوهيږي. نو ځکه زه غواړم چې يو فرصت پيدا کړم او په دې نندارتون کې د ګډون لپاره شانګهای ته لاړ شم او کتونکو ته افغان جلغوزي معرفي کړم. تمه لرم چې دغه ارمان په نژدې راتلونکې کې رښتيا کړم.