۱۳۹۹ د پوهنتونونو د استادانو سراسري اتحادیې په دوو بېلابېلو اعلامیو کې چې د جوزا میاشتې په لومړۍ او یوولسمه خپرې شوې، د حکومت له مشرانو وغوښتل چې د تعلیمي او تحصیلي ادارو پر سر دې سیاسي معاملې نه کوي. اتحاديې د حکومت له مشرانو غوښتي وو چې د لوړو زده کړو او پوهنې وزارتونو او د تخنیکي او مسلکي زده کړو ملي ادارې مشرۍ ته دې داسې کسان وټاکي چې مسلکي، په کار پوه، ملي ګټو ته ژمن، له هر ډول فساد پاک او غیر سیاسي کسان وي؛ خو متأسفانه، ولسمشر د تېر په څېر، یو ځل بیا د استادانو نظر ته پام ونه کړ او د دوی غوښتنه یې جدي ونه ګڼله. د پوهنتونونو د استادانو سراسري اتحادیه یو ځل بیا له ولسمشر غواړي چې نور په سیاسي معاملو او نامسلکي ګومارنو حکومت او په ځانګړي ډول تعلیمي او تحصیلي ادارې تخریب نه کړي. موږ ولسمشر ته ور یادوو چې یوازې په انګليسي ژبه پوهېدل سواد نه دی. موږ له بهره د راغلو افغانانو د ګومارنې مخالف نه یو، خو له بده مرغه په کور دننه د ډېرو پیاوړو کادرونو له موجودیت سره سره، هغوی پر دندو ګومارل کېږي چې د هېواد له واقعیتونو، ارزښتونو، تاریخ او جغرافیې سره بلدتیا نه لري، چې دا چاره د حکومت د کمزورۍ، ادارو کې د پراخ فساد، ګډوډۍ او ستونزو لامل شوې ده. د افغانستان د پوهنتونونو د استادانو سراسري اتحادیه د تعلیمي او تحصیلي ادارو د سیاسي کولو او تخریب پر ضد ودریږي. اتحادیه پر ټولو هېوادوالو هم غږ کوي چې د ادارو او په ځانګړي ډول د تعلیمي او تحصیلي ادارو د تخریب مخه ونیسي او پرې نږدي چې د سیاسي معاملو پر اساس پرې نامسلکي، کمزوري، شخصي او ګوندې ګټو ته ژمن، مفسد او له واقعیتونو ناخبره کسان واکمن شي. په پای کې یو ځل بیا له ولسمشر او شریکانو یې غواړو چې زموږ غږ واوري او موږ دې نه اړ باسي چې د تعلیمي او تحصلي ادارو د خونديتوب لپاره نورې جدي لارې وکاروو.
په درنښت!
د افغانستان د پوهنتونونو د استادانو سراسري اتحادیه