ا.ا: د شریعت په چوکاټ کې د ښځو حقونو ته ژمن یو

د ا.ا چارواکي وايي د ښځو د حقونو ساتنې او هڅونې ته ژمن دي. د ا.ا د ویاند مرستیال د افغان ښځو لپاره د امریکا د ځانګړې استازې رینا امیري د څرګندونو په غبرګون کې ویلي، چې په هېواد کې د شریعت په چوکاټ کې د ښځو او نجونو حقونه تر بل هر وخت خوندي او د هڅونې هڅې یې روانې دي. د افغان ښځو او نجونو د حقوقو په چارو کې د امریکا ځانګړې استازي رینا امیري پر ښځو د ا.ا د تازه محدودیتونو په اړه ویلي چې د افغان مېرمنو پر وړاندې تازه محدودیتونه به په افغانستان کې د فقر او بې ثباتۍ د زیاتوالي سبب شي. نوموړې ویلي چې پارکونو ته د ښځو پر تګ بندیز به د افغانستان لپاره ناوړه پایلې ولري.