د ملګرو ملتونو د ماشومانو د ملاتړ صندوق يا يونيسف وايي چې افغانستان کې د پوليو د محوې لپاره کور په کور د واکسينو کمپاينونو ته اړتيا ده چې تر دې مهاله نه ده پوره شوې. په افغانستان کې د يونيسف د رسنيو د برخې مسوول کمال شاه وايي چې د هېواد په ځينو ولايتونو کې لا هم د پوليو واکسينو کور په کور کمپاينونه نه دي شوي او يوازې په جوماتونو کې ماشومانو ته واکسين ورکول کيږي. هغه زياته کړې چې په جوماتونو کې ځينې ماشومانو له واکسينو پاتې کيږي او اړتيا ده چې د دې ناروغۍ د بشپړې محوې لپاره کور په کور د واکسين کمپاينونه تطبيق شي. د يونيسف دغه استازي ويلي چې د راتلونکي کال لپاره يې د عامه پوهاوي په ګډون د واکسينو د کمپاينونو لپاره پلانونه جوړ کړي او هڅه کوي چې د دې ناروغۍ بشپړې محوې ته يو ګام نور هم ور نږدې شي.
