مجاهد: نړیوال د ا.ا رسمیت پېژندلو په اړه هوکړې ته نه دي رسیدلي

ا.ا وايي، سره له دې چې په هېواد کې جګړه پای ته رسېدلې، خو نړیوالې ټولنې ا.ا په رسمیت نه دی پېژندلی. د ا.ا ویاند وايي، تر اوسه د نړۍ قدرتونه له ا.ا سره د رسمیت پیژندنې په اړه اصلي هوکړې ته نه‌دي رسېدلي او دا ستونزې زېږوي. شنونکي پر دې باور دي چې د رسمیت پېژندنې لپاره د نړۍوالو د شرایطو پوره کول او په ځانګړې توګه نجونو ته د زده‌کړو اجازې ورکړه به د سرپرست حکومت د رسمیت پېژندنې لپاره لاره خلاصه کړي. تر دې مخکې په ملګرو ملتونو کې د افغانستان د دایمي استازولۍ سرپرست ویلي چې، د افغانستان له سرپرست حکومت سره د نړۍوالو د اړیکو ښه والی د ټول ګډونه حکومت له جوړېدو، نجونو او ښځو ته د زده کړو او کار اجازې ورکړه، د بشري حقونو رعایتېدو او د نورو هېوادونو پر وړاندې د افغانستان د خاورې نه کارېدو پورې تړلی دی.