ټاکل شوې چې راتلونکې میاشت په قطر کې د افغانستان، ایران، پاکستان، د ملګرو ملتونو د کډوالو عالي کمېشنرۍ او د افغان کډوالو د یو شمېر ملاتړو هېوادونو ترمنځ ناسته ترسره شي. د کډوالو چارو وزارت مسلکي مرستیال عبدالرحمن راشد په کابل کې د ملګرو ملتونو د کډوالو نړیوال سازمان د دفتر له رييس ليونارد زولو سره په کتنه ویلي چې هلته د افغان کډوالو پر وضعیت د څلور اړخیزې ناستې د پایلو په اړه خبرې کېږي. په یاده ناسته کې د ملګرو ملتونو د کډوالو سازمان د دفتر له رییس څخه د هغو ژمنو د عملي کېدو غوښتنه شوې چې په ایران کې د افغان کډوالو د وضعیت په اړه په څلور اړخیزه ناسته کې شوې وې. په همدې حال کې هوکړه شوې چې د افغان کډوالو د وضعیت په اړه د پروګرامونو د همغږي کولو لپاره به د کډوالو چارو وزارت تر مشرۍ لاندې یوه ډله جوړه او راتلونکې میاشت به غونډه وکړي.
