د ماشومانو د خوندیتابه نړیوالې ټولنې یا سیف د چېلډرن خبرداری ورکړی چې په مرستندویه موسسو او نا دولتي ادارو کې د ښځو پر کار د بندیز له کبله به افغانستان کې ډېر شمېر ماشومان کار کولو ته اړ شي. دې ټولنې ویلي، دا بندیز به ډېر ماشومان مجبور کړي چې بېرته د سړک پر سر، کارخونو او یا د خلکو په کورونو کې کارونه وکړي، ځکه چې پر دوی هغه خدمتونو او مرستې اوس د افغانستان د سرپرست حکومت د بندیز له کبله درېدلې دي چې پخوا ور رسېدلې. په راپور کې همدا راز راغلي، دغه بندیز داسې مهال لګول شوی چې افغانان له خورا بد اقتصادي کړکېچ او د خوړو له کمښت سره مخ دي او ۲۸ میلیونه ماشومان او لویان بشري مرستو ته اړتیا لری. په راپور کې راغلي، تازه موندنې ښيي، په ۲۰۲۲ کال کې ۲۹ سلنه هغو کورنیو چې سرپرستانې یې ښځې دي، لږ تر لږه خپل یو ماشوم کار ته لېږلی دی، چې دا شمېر د ۲۰۲۱ پرتله ۱۹سلنه ډېر شوی دی.
