د پاکستان د بهرنیو چارو وزیر محمود قریشي وایي هند د افغانستان په چارو کې صادقانه چلند نه کوي او دلته د سولې او ثبات د راتګ ملاتړی نه دی. دده په وینا دغه هېواد په افغانستان کې په ځینو برخو کې په نا ارامیو کې هم لاس لري. قریشي همدا راز ادعا کړې چې د پاکستان په ځينو برخو کې هم د هند په اشاره نا امنیو ته لمن وهل کېږي. پاکستان داسې مهال دغه ادعا کوي چې په ځلونو د هند او ګڼو نورو هېوادونو له لوي په افغانستان کې د ترهګرۍ په ملاتړ او د جګړو په دوام تورن شوی دی. پاکستان په افغانستان کې د جګړې د ملاتړ او له ترهګرۍ سره د همکارۍ له امله د ګڼو نړیوالو سازمانو له بندیزونو او محدودیتونو سره هم مخ دی.
