روسیې او امریکا د افغانستان اړوند هڅو پر همغږۍ ټینګار کړی

روسي رسنۍ وایي چې په امریکا کې د روسیې سفیر د افغان سولې لپاره د امریکا د بهرنیو چارو وزارت له ځانګړي استازي زلمي خلیلزاد سره کتلي دي. په دې لیدنه کې پر افغان سوله او په افغانستان کې پر روان وضعیت خبرې شوې دي. روسیې او امریکا ټینګار کړی چې په افغانستان کې باید د دواړو هېوادونو هڅې همغږې شي او د سولې په راوستو کې همکاري ډيره شي. دوی همدا راز د نړیوالې ترهګرۍ پر وړاندې د مبارزې په برخه کې هم له یو بل سره پر همکارۍ ټینګار کړی دی. تر دې څه موده وړاندې د افغانستان پر سوله د روسیې، افغانستان او امریکا ګډ کنفرانس هم شوی و او ټینګار شوی چې له یو بل سره په همکارۍ به دلته روانه جګړه پای ته رسوي.