په ګورنو بدخشان کې د واورې ښوېيدنې له امله ۱۹ تنو خپل ژوند بایللی

د راپورونو له  مخې، د تاجکستان په ګورنو بدخشان ولایت کې د واورو ښوېیدو بېلا بېلو پېښو کې ۱۹ تنه مړه شوي دي. تاجکستان د افغانستان سره په ګاونډ کې د منځنۍ اسیا یو غرنی هیواد دی چې سږکال په کې ډیره واوره شوې ده. د راپورونو له مخې، د واورو د ښویدنې نږدې ټول قربانیان د غرني بدخشان اوسیدونکي دي؛ هغه خپلواکه سیمه چې د افغانستان، چین او قرغزستان سره ګډه پوله لري او د پامیر غرونو محاصره کړې ده. د دې سیمې د غرونو لوړه څوکه ۷۰۰۰ متره لوړه ده. د ګورنو بدخشان منزوي سیمه د تاجکستان شاوخوا نیمایي برخه جوړوي، خو ددې هیواد د ۹.۵ میلیون نفوس یوازې دوه سلنه په کې اوسیږي.