پر اماراتو د ۲۷۰۰ غیر قانوني افغان کډوالو د نیولو تور پورې شوی

د بشري حقونو د څار سازمان پر متحده‌عربي اماراتو د څه باندې ۱۵ میاشتو لپاره د شاوخوا ۲۷۰۰ افغان کډوالو د غیرقانوني توقیف تور لګولی. دغه افغانان چې د جمهوري نظام د سقوط پر مهال له افغانستانه وتلو ته اړ شوي په اماراتو کې د استوګنې قانوني اسناد نه‌لري. بلخوا د بشري حقونو د څار سازمان چې مرکز یې په نیویارک کې دی، په یوه تازه راپور کې چې نن خپور شو ویلي، ډېری افغان کډوال چې د اماراتو په بشري ښارګوټي کې دېره دي، ژور خپګان او نورې رواني ناروغۍ لري، مدافع وکیلان نه‌لري او ماشومان یې له زده‌کړو محروم دي. راپور زیاتوي چې د دې افغانانو د اوسېدو ځایونه بې خونده دي، په خونو کې یې ډېر خلک اوسېږي او له حشرو په عذاب دي.