م.م: افغان نجونو او نارینه وو ته دې د زده‌کړو مساویانه فرصت برابر شي

د ملګرو ملتونو کارپوهان وايي، په افغانستان کې باید ښځو او نارینه وو ته د باکیفیته زده‌‌کړو مساویانه فرصت برابر شي. دوی زیاته کړې، په افغانستان کې د ښځو او نجونو پر زده‌کړو غیرقانوني بندیز به د یوه نسل او همدارنګه د افغانستان پر راتلونکې منفي اغېزې پرېباسي. د کاروپوهانو په راپور کې همدارنګه ویل شوي، د افغانستان پر نیمايي وګړو د زده‌کړو دروازې تړل د ښځو او نجونو د انساني حقونو تر پښو لاندې کول دي. د ملګرو ملتونو د کارپوهانو په خپره شوې خبرپاڼه کې راغلي، په افغانستان کې د نوي ښوونیز کال پیلېدو سره باید په ټول هېواد کې نجونو او ښځو ته د زده‌کړو فرصت برابر شي. دوی زیاته کړې داسې ښکاري چې په افغانستان کې نجونې پرله پسې دویم کال له شپږم ټولګي پورته زده‌کړو څخه منع شوې دي.