د پکتیا د ۵ ولسوالیو اوسېدونکو ته د څښاک پاکې اوبه برابریږي

د پکتیا ولایت په احمد آبا، میرزکې، اریوب ځاځي، احمد خېلو او څمکنیو ولسوالیو کې د نږدې ۶ میلیونو افغانیو په لګښت د اوبو شپږ شبکې جوړېږي چې په جوړېدو سره به یې ۱۹۱۰ کورنیو ته د څښاک اوبه برابرې شي. د یادو ولسوالیو اوسېدونکي وايي، په زیاتره سیمو کې خلک د څښاک د پاکو اوبو نشتون له امله  له ککړې اوبو استفاده کوي او د څښلو پرمهال یې خلک په بېلابېلو ناروغیو اخته شوي دي. د یادونې وړ ده، چې د هیواد ډېری سیمې په تېرو څو کلونو کې وچکالیو سختې ځپلې دي او د کرکیلې د پيکه کېدو تر څنګ یې د څښاک اوبو ته لاسرسی هم ستونزمن کړی دی.