پاکستاني چارواکي په سېند صوبه کې د سمندري توپان له وېرې ۹ زره کورنۍ خوندي ځایونو ته انتقالوي. د سېند اعلی وزیر مراد علي شا ویلي چې له پوځ یې همکاري غوښتې او د شاوخوا ۹ زره کورنیو د خوندیتوب لپاره یې ځینې ځایونه ټاکلي دي. د پاکستان د طبیعي پېښو ادارې پرون ویلي چې په عرب سمندرګي کې سمندري توپان د کراچۍ له ښاره شاوخوا شپږ سوه کیلومتره لرې دی. دوی هیله ښودلې چې په راتلونکو ورځو کې د دغه طوفان مخه واوړي. سره له دې هم د پاکستان د طبیعي پېښو ادارې ویلي چې د سختو اورښتونو او د اوبو د کچې د راپورته کېدو ګواښ شته.
