د چين د دولت رئيس شي جين پينګ د جون د ۱۲مې نېټې په ماسپښين د بېجينګ د خلکو په لوی تالار کې د هندوراس له ولسمشرې انيريس سيومارا کاسترو سره خبرې وکړې.
شي جين پينګ وويل، کاسترو د هندوراس په تاريخ کې لومړۍ ولسمشره ده چې له چين څخه رسمي ليدنه کوي او ليدنې يې د دواړو هېوادونو ترمنځ د اړيکو نوې پاڼه اړولې ده. د سږکال په مارچ کې د چين او هندوراس ترمنځ د رسمي اړيکو له ټينګېدو راهيسې دوه اړخيزو اړيکو چټک پرمختګ کړی. چين به له هندوراس سره د دوستانه اړيکو پر پياوړتيا ټينګار وکړي او د دغه هېواد له اقتصادي او ټولنيز پرمختګ څخه به ټينګ ملاتړ وکړي او غواړي، چې له هندوراس سره د متقابل درناوي، ګډو ګټو او ګډ پرمختګ په چوکاټ کې ښه مګلري شي.
شي جين پينګ زياته کړه، چې چين د ملي حاکميت د ساتنې، د پرمختګ د پياوړتيا او د خلکو د ژوند د ښه والي په برخو کې د هندوراس د کوښښونو ملاتړ کوي او د دولتي وضعيت له مخې د هېواد د پرمختيايي لارې په اړه د هندوراس د انتخاب درناوی کوي او هيله لري، چې له دغه هېواد سره د حکومتوالۍ د تجربو تبادلې پياوړې کړي او د بېوزلۍ د له منځه وړلو، د ټولنې د ادارې او د فساد ضد مبارزې په برخو کې خپلې تجربې شريکې کړي. دواړه خواوې بايد ستراتيژيک پيوستون پياوړی کړي او د يو کمربند او يوې لارې د ابادۍ تر چوکاټ لاندې ګډ پرمختګ وهڅوي.
دواړو مشرانو له خبرو اترو وروسته د يو کمربند او يوې لارې د ابادۍ، اقتصاد او سوداګرۍ، زراعت، علمي ټېکنالوژۍ او کلتور په برخو کې د همکاريزو سندونو د لاسليک په مراسمو کې ګډون وکړ.
دواړو مشرانو د چين او هندوراس ګډه اعلاميه خپره کړه.
