له پاکستان څخه ننګرهار ته نږدې ۴ زره افغان کډوال راستانه شوي

د ننګرهار د رسنیو دفتر د دې ولایت د کډوالو او راستنېدونکو چارو رياست د مسوولینو په حواله خبر ورکړی چې په تېرو دريو مياشتو کې له پاکستانه ننګرهار ته شاوخوا ۳۸۰۰ افغان کډوالې کورنۍ راستنې شوې دي. د ننګرهار د رسنیو دفتر په یوې خبرپاڼه کې زیاته کړې، هره ورځ له ۲۰ څخه تر ۷۰ افغان کورنۍ خپل هېواد ته راستنېږي، خو په وروستيو کې په پېژندپاڼې د اجازې ورکړې سره د دې بهیر کچه لوړه شوې ده. دا په داسې حال کې ده چې د پاکستان حکومت ویلي، افغان کډوال د کډوالۍ قانوني اسنادو له لرلو پرته، یوازې له پېژندپاڼو سره هم کولی شي د اختر په ورځو کې خپل هېواد ته ستانه شي.