د چين د دولت رئیس مرستيال هان چينګ د جولای په ۲مه نېټه په چینګهوا پوهنتون کې د نړیوالې سولې د ۱۱م فورم په پرانيستونکو مراسمو کې ګډون او وينا وکړه. د نوي پرمختيايي بانک د مشرې او د برازيل پخوانۍ ولسمشرې دلما روسف، د روسيې د فدرالي امنيت شورا د پخواني منشي سیرګي ايوانوف، د اندونيزيا د بهرنيو چارو د پخواني وزير حسن ويرايودا او نورو بهرنيو سياستوالو، په چين کې د بېلا بېلو هېوادونو د سفيرانو او کارپوهانو په ګډون څه د پاسه ۴۰۰ تنو په دې مراسمو کې ګډون کړی و.
هان جنګ وويل، له سترو بدلونونو سره د نړۍ حالت د مخکېدو پر وړاندې د چین دولت رئيس شي جين پينګ د نړيوال پرمختګ، نړيوال امنيت او د نړيوال تمدن وړاندیزونو په شمول يو لړ ستر وړانديزونه کړي چې په پرله پسې توګه يې د انسانانو د ګډ برخلیک ټولنې د مفهوم عملي لاره روښانه کړې او په دې سره يې د انسانانو پر وړاندې د ګډو ستونزو د حل لپاره د چین معقولې لایحې وړاندې کړي او د نړۍ سوله ییز پرمختګ ته يې قوي خوځنده ځواک برابر کړی. چين غواړي له بېلا بېلو هېوادونو سره په ګډه نړیواله سوله او امنيت وساتي، نړيوال پرمختګ او سمسورتيا ومومي، د تمدنونو په برخه کې متقابلې زده کړې او تبادلې پياوړې کړي او د بشر پرمختګ، امنيت او تمدن په برخو کې لاسته راوړنې شريکې کړي.