د میدان وردګو ولایتي چارواکي وایي چې د دغه ولایت په جلرېز او لومړۍ حصه بهسودو ولسوالیو کې د کوچیانو او هزاره ګانو ترمنځ د څارویو او څړ ځایونو پر سر رامنځته شوې شخړه هواره شوه. د یاد ولایت مقام څخه په خپره شوې خبرپاڼه کې راغلي چې د دغه ولایت والي په مشرۍ یوه کمېسیون په جلرېز او لومړۍ حصه بهسودو ولسوالۍ کې د کوچیانو او هزاره ګانو ترمنځ شخړه په سولهییزه توګه هواره کړې ده. خبرپاڼه زیاتوي چې د کوچیانو او هزاره وو ترمنځ دغه شخړه د جلرېز په «سرچشمه» او د لومړۍ حصه بهسودو ولسوالي په «ګرندیوال» سیمو کې رامنځته شوې وه چې ۲۰ کاله یې دوام وکړ او دواړو لورو ته د سر او مال زیانونه هم اوښتي وو. د ورکړل شویو معلوماتو له مخې دواړو لورو په دې هوکړه کړې چې سر له نن څخه به په یوه او بل باندې تېری نه کوي او په سولهییزه فضا کې به خپل ژوند ته دوام ورکوي.
