افراسیاب خټک: پاکستان د افغانستان پر وړاندې سم او سالم سیاست نه لري

د پاکستان په سنا کې پخواني سناتور او پښتون سیاستوال افراسیاب خټک وایي پاکستان د سیمې د ټولو هېوادونو په تېره د افغانستان پر وړاندې سم او سالم سیاست نه لري او ټول کارونه یې نمایشي دي. دده په خبره پاکستان وخت او وضعیت ته په کتو د افغانستان په هکله نمایشي کارونه ترسره کوي او ډېر وخت موقتي وي. هغه زیاتوي، په وروستیو کې پاکستان له افغانستان سره ګڼې سوداګریزې لارې پرانیستې دي، چې په بدل کې یې له افغان حکومت ارو مرو کومه تمه لري او دا کار یې نمایشي او تېر ایستونکی دی. هغه وایي پاکستاني حکومت ته په کار ده چې د افغانستان او پاکستان د ودې او پرمختګ لپاره سالم سیاست غوره کړي او په سیمه کې له ټولو هېوادونو سره رښتینی چلند وکړي. خټک له پاکستان دا هم غوښتي چې د طالبانو د ملاتړ پر ځای دې یو مستقل افغانستان ومني او له افغان حکومت سره دې اړیکې پیاوړې کړي.