کورنیو چارو وزارت په ملکي او نظامي برخو کې ۷۴ زره کسان جذبوي

کورنیو چارو وزارت ویلي، چې د دغه وزارت په ملکي او نظامي برخو کې ۷۴ زره کسان جذبوي. د کورنیو چارو وزارت ویاند عبدالمتین قانع ویلي، دغه کسان به د تصفیې د کمېسیون له څېړنو وروسته وګومارل شي او لومړیتوب به هغو کسانو ته ورکول کېږي چې په تېرو شلو کلونو کې یې له ا.ا سره کار کړی دی. بل لور ته د پوځي چارو شنونکي وايي، چې د دغو کسانو د جذب تر څنګ باید د هغوی مسلکي روزنې او تجهیزاتو ته هم باید جدي پام وشي. له بلې خوا د سرپرست حکومت ویاند وايي، هغه کسان چې اړتیاوې پوره کوي په امنیتي ادارو کې به وګومارل شي. تر اوسه څرګنده نه ده چې له دغو کسانو څخه به څومره په نظامي او څومره به د کورنیو چارو وزارت په ملکي برخه کې وګومارل شي او د تېر حکومت د پوځ د استخدام په اړه هم څه نه دي ویل شوي.