په وروستيو کې د اروپايي ټولنې کمېسيون رئيسې اورسولا ون دير ليون اعلان کړی چې د چين د برېښنایي موټرو اړوندو تصديو ته د مرستندويه پيسو د ورکړې پر ضد به پلټنه پيل کړي. په دې اړه د اروپا په دننه کې غړو هېوادونو ډېر بحثونه کړي دي. ځينې وايي چې په اقتصادي سيالۍ کې د چين مخنيوی د اقتصادي ستونزو د لرې کولو ښه تګلاره نه ده او جزایي تعرفې او سوداګريز خنډونه به يوازې په سوداګرۍ کې ښکېلو خواوو ته زيانونه ورسوي. د المان د موټر تصدۍ هم په دې اړه اندېښمنې دي چې د اروپايي ټولنې د يادې کړنې له امله به د ګمرکاتو په برخه کې له چين سره مبارزه وکړي او د خپل هېواد د موټرو صنعت به دايمي ګټو ته ورسوي. د لوېديځو هېوادونو د عامه افکارو په اند د اروپايي ټولنې له يادې پرېکړې څخه ښکاري چې د اروپا ځينې هېوادونه له عادلانه سيالۍ څخه وېره لري.
د اروپا خبري رسنيو خبر ور کړی چې د يادې پرېکړې پر وړاندې د المان او فرانسې رويې بېلې دي: د فرانسې حکومت او د موټرو صنعت د اروپايي ټولنې له پرېکړې څخه ملاتړ کوي، خو د جرمني د موټرو ټولنې له يادې کړنې سره مخالفت کوي. ولې د دوی رويې بېلې دي؟ لامل يې اسانه دی. څرنګه چې د چين په بازار کې د جرمني د موټرو صنعتي ګټې د فرانسې په پرتله زياتې دي او پر دې اندېښمن دي چې د اروپايي ټولنې يادې پرېکړې ځان ته سخت زيانونه ورسوي. دغه ټکي ته په کتو سره د اروپايي ټولنې کمېسيون په منطقي ډول د اروپا د ټولو غړو هېوادونو ګټو ته پاملرنه نه کوي. د المان ((WiWo)) مجلې په خپلې مقالې کې داسې ليکلي چې د چين د برېښنایي موټرو په مقابل کې د اروپايي ټولنې پرېکړه د سياسي عواملو له خوا پرمخ وړل شوې ده.
په اروپايي بازار کې د برېښنایي موټرو په هکله د نړیوالو تصديو سيالي سخته ده. اوس مهال په دې بازار کې د چين برېښنایي موټر شاوخوا په سلو کې اته برخه نيولې ده چې رقم يې لوړ نه دی. اړوندې تصدۍ لاهم د يادې برخې د زياتېدو لپاره هڅې کوي. د بيې له لحاظه په اروپايي بازار کې د چين برانډ لرونکي موټرو بيې د چين د کورني بازار په پرتله لوړې دي. نو ځکه د چين د برېښنایي موټرو په مقابل کې د مرستندويه پيسو ضد پلټنه بې دليله ده.
په لوېديځو هېوادونو کې متل دی وايي چې روم په يوه ورځ کې نه شي جوړېدای. ولې په وروستيو کلونو کې د چين د برېښنایي موټرو صنعت په بازار کې له نورو هېوادونو سره د سيالۍ پياوړی توان لري، عمده لامل يې دا دی چې د چين د موټرو تصدۍ اړوند نوښت او څېړنې ته ادامه ورکړي او صنعتي ځنځيرونه د نورو هېوادونو په پرتله بشپړ دي. خو اروپا د هغو موټرو د توليدي مرکز په توګه چې نفت پکې استعمالوي، د برېښنایي موټرو د توليدولو او څېړلو په برخه کې تر چين او امريکا وروسته پاتې ده. ځينو اروپايي هېوادونو او د موټرو لويې تصدۍ پر دې اندېښمنې دي چې د چين برېښنایي موټرونه به د اروپايي بازار ټوله برخه ونيسي. دغه اندېښنه د يادې پرېکړې واقعي لامل شوی دی.
له اوږدې مودې راهيسې چين د اروپا د موټرو تصدۍ مهم بازار ګڼل کېږي. د چين حکومت هېڅکله خپل کورني بازار ته د دوی د موټرو د داخلېدو لپاره خنډونه نه دي جوړ کړي او د دغو تصديو ثابتې ګټې تضمين شوي دي. نو کله چې د چين برېښنایي موټرو صنعت پرمختګ موندلی دی، ولې اروپا يو شان رويه نه ده غوره کړې؟ اروپايي ټولنې د عادلانه سيالۍ په پلمه ياده پرېکړه وکړه او سوداګرۍ ساتونکې رويه غوره کوي چې دا نه يوازې د بازاري اقتصاد د عادلانه او پرانيستې سيالۍ له اصولو څخه بلکې د ازادې سوداګرۍ په هکله د دغه کمېسیون له دريځ څخه سرغړونه هم ده.
حقيقت دا دی چې اروپا په نړۍ کې د موټرو مهمه توليدي اډه ده او د برانډونو، مستعدو کسانو او تخنيک په برخو کې ډېرې تجربې لري، نو د برېښنایي موټرو د پرمختګ لپاره ډېر ګټور شرایط هم لري. د بهرنۍ سيالۍ پر وړاندې اروپا بايد په عادلانه بازاري چاپېريال کې د خپلو چارو د سيالۍ توان د پياوړتيا لپاره پر ځان باندې باور ولري.
د چين او اروپا د موټرو چارو له لحاظه دواړه خواوې ډېر همکاريز فرصتونه او ګډې ګټې لري او په دې برخه کې يې يو له بل سره یو ځای شوي دي. د يو اړخيزم او سوداګرۍ ساتونکې کړنې د ډېرېدو په حال کې چين او اروپا بايد د خبرو اترو او مشورو له لارې اوسني توپيرونه لرې کړي، له سوداګرۍ ساتونکې کړنې سره دې مخالفت وکړي او د نړيوال صنعتي ځنځيرونو ثبات دې وساتي.