د ۱۹مې دورې اسیايي سپورټي لوبې د سپتمبر په ۲۳مه نېټه د چین په هانګ جو ښار کې پرانیستل شوې. د اسیا د مختلفو هېوادونو مېلمنو او پلاویو د دې لوبو د پرانیستې په مراسمو کې ګډون کړی دی. په دې جمله کې د سوریې ولسمشر بشارالاسد راتګ ډېر د پاملرنې وړ دی.
د سوریې کورنۍ جګړه په ۲۰۱۱م کال کې پيل شوه او امریکا د سوریې حکومت له مخالفینو ډېر ملاتړ کړی او کوي يې. نو د بشارالاسد حکومت په تېرو لسګونو کلونو کې د امریکې د سختو بندیزونو له امله یوازې د منځني ختیځ هېوادونو او روسیې ته سفر کړی. چین ته د بشارالاسد دغه سفر په تېرو لسګونو کلونو کې د ده تر ټولو اوږد سفر دی. هغه مخکې په ۲۰۰۴م کال کې له چین څخه رسمي لیدنه کړې او دا چین ته د ده دوهم سفر دی.
دا چې بشارالاسد لا هم د امریکې له بندیز سره مخ دی، چین د ده د ورتګ لپاره یوه ځانګړې امنه لار ټاکلې او ده د چین په یوه ځانګړې الوتکه کې سفر کړی دی.
کله چې بشارالاسد هانګ جو ښار ته ورسېد، د چیني چارواکو له خوا يې تود هرکلی وشو.
بشارالاسد يې له خپلې مېرمنې سره د هانګ جو له لینګ ین له معبد څخه لیدنه وکړه، د اسیايي سپورتي لوبې په پرانیستې په مراسمو کې نندارچیانو د سوریې له پلاوی په چک چکو هرکلی وکړ او بشارالاسد په دې ډېر خوښ او خوشاله شو.
د لوېديځو هېوادونو له خوا د نړۍ جوړه شوې بڼه کې ، دا هېڅ امکان نه لري چې د نړۍ په کچه يو اغېزلرنکی هېواد له يوه کوچني او جګړې ځپلي هيواد مشر ته په لوی فعالیت کې د ګډون بلنه ورکړي او یا ور سره همکارۍ کوي. د ډېرو لوېديځو سیاستوالو په اند، کوچیني هېوادونه د خبرو او نظر حق نه لري او باید هغوی د پياوړو هېوادونو تر کنټرول لاندې وي.
خو اوس دغه حالت بدل شوی. په چین کې هر یو هېواد مساوي حقونه لري او د هر چا درناوی کېږي. چین په عادلانه توګه له ټولو هېوادونو سره د سوله ییز پرمختګ په اړه د نظریو تبادلې کوي.
چین څه موده مخکې د ایران او سعودي عربستان ترمنځ کړکیچ په سیاسي حل کې منځګړیتوب کړی او په دې سره د منځني ختيځ ترینګلی وضعیت تر ډېرې اندازې پورې ارام شوی او د سیمې نورو هېوادونو ته د پرمختګ نور ښه فرصت برابر شوی دی. په عین وخت کې په عرب لیګ کې د سوریې د بېرته یو ځای کېدو زمینه هم برابره شوې ده او ښايي د منځني ختيځ وضعیت آرامتیا نوره هم وهڅول شي. سوریه غواړي له چین سره همکارۍ نورې ژورې کړي او د منځني ختيځ نوې امنیتي بڼه جوړه کړي او هغوی د واشنګټن له زور کنټروله وباسي.
امریکايي ځواکونه له تېر لسګونو کلونو په ناقانونه توګه د سوریې په شمال ختيځ کې میشت وو او د لوټمارۍ عملونه يې ډېر کړي او ځايي خلکو ته يې سخت زیانونه رسولي دي. د سوريې حکومت په روانه میاشت کې ملګرو ملتونو ته د یو پيغام په لیږلو سره پر واشګټن دعوا وکړه چې د سوریې شتمني او ستراتيژيکې سرچینې يې لوټ کړې او باید سوریې ته د ۱۱۵ میلیارډه امریکايي ډالر تاوان ورکړي.
ځواکمن هېوادونه باید د ځاني پرمختګ په عین وخت کې له نورو سره مرستې وکړي. خو د لوېديځو هېوادونو سیاستوال په تېره بیا د امریکې سیاستوال په دې هېڅ نه پوهېږي. خو هغه هېوادونه چې مخکې یا اوس د لوېديځو هېوادونو تر بندیزونو او ځپلو لاندې دي، په دې ښه پوهېږي.
د وینزویلا ولسمشر نیکولس مادرو موروس د روان سپټمبر له ۸مې تر ۱۴مې نېټې چین ته سفر وکړ. سوریه او وینزویلا، یو په منځني ختيځ کې او بل په لاتینې امریکا کې، دواړه هېوادونه یو له بله ډېر لرې پراته دي، خو ډېر ورته والی لري، دوی دواړه د امریکې تر بندیزونو لاندې دي، د واشنګټن د لاسوهنې له امله د دغو دواړو هېوادونو د پرمختګ پروسه زیانمنه شوې. په عین وخت کې دوی له چین سره همکاریزې اړیکې ټينګې کړې او دا د خپل هېواد برخلیک د بدلېدو لپاره کلیدي فرصت بولي. لامل يې دا دی چې چین ورسره د همکارۍ او تبادلې په ترڅ کې تل د دوی درناوی کړی او صمیمي رویه يې غوره کړې ده.
