د پکتیا د کلیو، بیارغونې او پراختیا ریاست مسوولین وايي، چې د مرکز ګردېز په بېلابېلو کلیو کې د یونپس موسسې په مالي ملاتړ د ۳۰ میلیونو ۹۱۷ زره او ۶۲۱ افغانیو په لګښت د ۲۴ پروژو چارې پیل شوې. د دغه ولایت د کلیو بیارغونې او پراختیا رییس میرزاجان صادق وايي، چې دغه پروژې د ګردېز په ۱۸۵ کلیو کې په حفظ او مراقبت، سړکونو د بیارغونې، پلونو، د اوبولګولو، ترانسپورټ او نورو برخو کې پلې کېږي او ټاکل شوې چې چارې يې په راتلوونکو ۳ میاشتو کې بشپړې شي. د خلکو په مشرۍ د پرمختګ موسسې ولایتي مسول اسماعیل ظریفي د دغو پروژو چارو پیل مراسمو پرمهال ویلي، چې له دې سره ۱۹۶۷ ځايي کسانو ته د کار زمېنه هم برابرېږي. د کلیو، بیارغونې او پراختیا ریاست مسوولینو د معلوماتو له مخې د دغه پروګرام ټوله بودیجه ۲۶۵ میلیونه امریکایي ډالره ده، چې د ملګرو ملتونو د پروژوي خدماتو دفتر یې په افغانستان کې پلې کوي.
