په جلال اباد او بغلان ولایتونو کې لسګونه کسانو د ننګرهار ولایت پر ګمبیري دښته د یو سیمه ییز هوایي ډګر جوړېدو غبرګون کې لاریون کړی دی. لاریونوال وایي، د ګمبېرۍ دښته د سردار محمد داوود خان د ماسټر پلان له مخې زراعتي ځمکه وه او د دې ځمکې لپاره د کونړ پر سیند باید بند جوړ شي، چې د دې هدف د پوره کولو په موخه جاپاني الاصله افغان ناکامورا د پاکستان لخوا ووژل شو څو دلته بند جوړ نه شي او د کونړ د سیند اوبه پاکستان ته روانې وي. اوس چې افغان حکومت د ماسټر پلان برخلاف پر دې دښته هوايي ډګر جوړوي، دا په دې مانا ده چې افغان حکومت دا کار د ایران او پاکستان په خوښه کوي. دوی زیاته کړې دوی پر ګمبیري دښته د هوایي ډګر جوړېدو ته اجازه نه ورکوي او په وینا یې که چېرته حکومت له خپلې پرېکړې په شا نه شي نو په ټول هېواد کې به پراخ لاریونونه تنظیم کړي.
