د ازبکستان د لومړي وزیر مرستیال جمشید خواجهیوف په مشرۍ د یاد هېواد یو رسمي پلاوی کابل ته راغی. په دې ۴۵ کسیزه پلاوي کې د یاد هېواد د کانونو، ترانسپورټ او سوداګرۍ وزیران، د یو شمېر خپلواکو ادارو رییسان او سوداګر شامل دي. د دغه پلاوي د سفر موخه د دوه اړخیزې سوداګرۍ پراختیا، د دواړو هېوادونو تر منځ د ترانزیتي ستونزو د حل لارې موندل او په کابل کې د دغه هېواد د سوداګریزو مالونو د نندارتون پرانیسته یاده شوې ده.
