د افغانستان یوه ملي سوداګر حکیم الله نورزي له پاکستانه راتلونکو افغان کډوالو ته د اوسېدو لپاره خپله ۳۰۰ جریبه پلرنۍ ځمکه ځانګړې کړې ده. نوموړي ملي ټلويزيون ته ویلي، چې د ارزګان ولایت په خاص ارزګان ولسوالۍ کې یې دغه ځمکه د لسو کلونو لپاره راستنېدونکو کورنیو ته ځانګړې کړې ده. ده زياته کړې، چې له نورو سوداګرو سره په ګډه پلان لري چې له پاکستانه راتلونکو کډوالو ته د پاکو اوبو او نورو اړتیاو د پوره کېدو امکانات برابر کړي. دا په داسې حال کې ده چې پاکستان د نومبر په لومړۍ نېټه دغه هېواده په رسمي ډول د بې اسناده افغان کډوالو د ایستلو لړۍ پیل کړې ده.
