د روسیه مټرز په نامه نشریه وایي، په افغانستان کې د روسیې تحرکات په دې موخه نه دي چې په دغه هېواد کې له امریکا څخه د مجاهدینو د دورې انتقام واخلي، بلکې یوازینۍ موخه یې سیمه ییز ثبات دی. د ورځپاڼې په خبره، په وروستیو کې د امریکایي رسنۍ له لوري داسې ادعاوې وشوې چې ګوندې روسیې په افغانستان کې د امریکایانو د وژنې پر سر طالبانو ته پیسې ورکړې دي. ورځپاڼه کاږي، دې ادعاوو چې په اړه یې هیڅ شواهد هم موجود نه وو خو بیا یې هم د دواړو هېوادونو اړیکې اغېزمنې کړې دي. د راپور له مخې، دا سمه ده چې روسیه له ډېرې مودې راهیسي له طالبانو سره اړیکې لري خو په خبره یې، د دې اړیکو موخه له امریکا انتقام نه بلکې سیمه ییز ثبات دی. د راپور په وروستۍ برخه کې راځي، روسیه د مرکزي اسیا د امن او ثبات لپاره یوه روښانه او غښتلې پالیسي مخته وړي او د همدې پالیسي پر بنسټ افغانستان کې هم خپل سیاستونه تعقیبوي.
