د پاکستان د بهرنیو چارو وزارت ویلي، چې د روسیې- پاکستان د ګډ کاري ګروپ په لسمه غونډه کې چې پرون په اسلام آباد کې جوړه شوه د روسیې د بهرنیو چارو مرستیال وزیر سیرګي ویرشینین او د هغه پاکستاني سیال سیدحیدر شاه ګډون کړی و. د پاکستان د بهرنیو چارو وزارت په یوه بیان کې ویلي، چې دواړو خواوو په دې غونډه کې په سیمه او نړۍ کې د امنیتي ګواښونو په اړه خبرې وکړې او په دې ترڅ کې یې د افغانستان، منځنۍ او جنوبي آسیا او شمالي افریقا په اړه ځانګړی بحث وکړ. په راپور کې راغلي چې پاکستان او روسیې موافقه وکړه چې دواړه هېوادونه به د تروریزم د مالي سرچینو د وچولو او د تروریزم پر ضد د مبارزې په نورو برخو کې په خپلو کې همکاري کوي.
