هند کې له بند پاتې ۴۱ کارګرو سره ویډیویي اړیکه نیول شوې

هندي چارواکو اعلان وکړ چې دوی د هېواد په شمال کې د سړک د تونل د نړیدو نه نهه ورځې وروسته په تونل کې بند پاتې ۴۱ ساختماني کارګرانو سره ویډیویي اړیکه نیولې. هندي چارواکي وایي چې ټول کارکوونکي روغ رمټ دي. هندي چارواکو پرون اعلان وکړ چې د دغه هېواد مرستندویه ځواکونه توانېدلي چې د تونل هغې برخې ته یوه کامره په بریالیتوب سره ولېږدوي چېرته چې کارګران بند پاتې. رویټرز راپور ورکړی چې د یوه مرسته کوونکي غږ اوریدل کیږي چې له کارګرانو غواړي یو یو کس د کامرې مخې ته راشئ او ځانونه معرفي کړئ. د دغه هېواد د چارواکو لخوا په خپرې شوې ۳۰ ثانیې ویډیو کې، چې د کامرې مخې ته ۱۲ کارګران د نیمه دایرې په شکل ولاړ دي ښکاري. دغه کارګران د لړم په ۲۱مه د تونل د یوې برخې د نړیدو له امله د دغه تونل په ۲۰۰ متره واټن کې بند پاتې دي.