کندهار کې د لومړي ځل لپاره د زعفرانو نندارتون پرانېستل شو چې د دغه ولایت له بېلابېلو ولسوالیو څخه پکې کروندګرو ګډون کړی او خپل حاصلات یې نندارې ته اېښي دي. د کندهاري زعفرانو په نوم دغه نندارتون پرون جوړ شوی چې د یاد ولایت د بېلابېلو ولسوالیو کروندګرو لهخوا پکې زعفران نندارې ته کېښودل شوې دي. د کندهار د زعفرانو ټولنې مشر محمد داود چې د زعفرانو په بابا هم مشهور دی، وايي، د کندهار هوا د زعفرانو لپاره مناسبه ده او په وینا یې، کروندګر کولی شي د دغه نبات کرلو سره ښه حاصل ترلاسه کړي. نوموړي وویل، د تېرکال په پرتله دغه ولایت کې د زعفرانو په کښت کې ۳۰ سلنه زیاتوالی راغلی دی. د هغه په وینا، یوشمېر کروندګر یې د زعفرانو کرلو لپاره روزلي او ۳۰ کسان یې هرات ولایت ته د دې کښت لارو چارو زدهکړو لپاره لېږلې دي. دامهال د دغه ولایت په پنځو ولسوالیو ارغنداب، ډنډ، پنجوايي، میوند او ژېړۍ کې ۵۰۰ کروندګرو پر شاوخوا ۳۰۰ جریبه ځمکه زعفران کرلي چې په اوسط ډول یې یو کیلو زعفرانو څخه ۹۰زره افغانۍ عاید ترلاسه کړی دی.
