د هرات ځپلو سره د اروپايي ټولنې د مرستو بله جوپه کابل ته راورسېده

اروپايي ټولنې ویلي، چې د دغې ټولنې ۵۸ ټنه بشري مرسته د هرات زلزله ځپلو لپاره پرون کابل ته رسېدلې ده. دغې ټولنې ویلي تر هغې چې اړتیا لیدل کېږي، دوی به له افغانستان سره خپلو مرستو ته دوام ورکړي. شاوخوا دوه میاشتې وړاندې د رېښتر په کچه د ۶.۳ درجې زلزلې او له هغې وروسته پر له پسې ټکانونو د هرات ولایت ولړزاوه، چې له امله یې زرګونه کسان مړه او ټپیان شول. همدارنګه د دغې زلزلې له امله د هرات په زنده‌جان ولسوالۍ کې زرګونه کورونه هم ویجاړ شول.