پاکستاني پوځ په بهرامچه او شملزو کې دروازې جوړې کړې دي

په هلمند کې ځايي خبریالان وایي چې ددغه ولایت په بهرامچې ولسوالۍ کې پاکستاني عسکرو دوې دروازې جوړې کړې دي. ځایي خلکو خبریالانو ته ویلي چې پاکستاني ځواکونو په دغه ولسوالۍ کې اغزن سیم تېر کړی دی، بیا یې دوې دروازې جوړې کړې دي چې د ماسپښین له درېیو تر پنځو بجو د خلکو د تګ راتګ پر مخ پرانیستې وي. بلخوا ویل کېږي چې پاکستاني ملیشو د زابل په شملزو ولسوالۍ کې هم دروازه درولې ده. په زابل کې ځايي خبریالان وايي چې پاکستاني عسکرو په صفري نقطه کې ګمرکي تاسیسات جوړ کړي او دروازه یې درولې ده. د هلمند بهرامچه او د زابل شملزو ولسوالي له کلونو راهیسې د طالبانو تر نفوذ لاندې دي او تر ډېره نا امنه بلل کېږي. د یادو دوو دروازو په اړه افغان حکومت غبرګون نه دی ښودلی. پاکستان تر دې وړاندې په کونړ، خوست، جلال اباد او ځینو نورو ځایونو کې هم دغه ډول دروازې او غیر قانوني نظامي تاسیسات جوړ کړي چې حکومت یې پر وړاندې د پام وړ اقدام نه دی کړی.