پاکستان نورو هېوادونو ته د تلونکو افغانانو د اوسېدو موده وغځوله

د پاکستان سرپرست حکومت د هغه افغان کډوالو لپاره په دغه هېواد کې د اوسېدو موده وغځوله چې مناسب اسناد نه لري خو لوېدیځو هېوادونو ته د بیا مېشتېدو تر پلان لاندې تللو ته په تمه دي. په اسلام اباد کې د سرپرست حکومت د اطلاعاتو وزیر مرتضی سولنګي یوې خبري ناستې ته ویلي چې، د ۲۰۲۳ کال د ډسمبر له ۳۱ تر د ۲۰۲۴ کال د فبرورۍ تر ۲۹ نېټې پورې یې د اوسېدو د مودې د غځولو پرېکړه په دې موخه کړې چې افغان وګړي خپل قانوني اسناد ترلاسه کړي او ورسره یو درېم هېواد ته یې ژر تر ژره د تلو بندوبست حتمي وشي. د نوي قانون او مقرراتو له مخې هغه بې اسناده افغان وګړي چې درېم هېواد ته د تلو په تمه دي، د قانوني اسنادو د ترلاسه کولو فیس یې اوس د ۸۰۰ ډالرو پرځای ۴۰۰ ډالر ټاکل شوی دی. خو که تر ټاکلې مودې پورې دوی خپل اسناد ترلاسه نشي کړای نو میاشتنۍ جریمه به یې ۱۰۰ ډالر او او لوړه جریمه به یې ۸۰۰ ډالره وي.