د امریکا د نوښتونو د انستیتوت یو کارپوه مایکل روبین وایي د وسله والو طالبانو مخینې ته په کتو دغه ډله تر ډېره د ستونزو پر نظامي حل تمرکز کوي او د خبرو دومره مخینه نه لري. د روبین په خبره اوس هم په دې اړه شک موجود دی چې ښايي د امرکایي ځواکونو تر وتلو وروسته طالبان د زور له لارې واک ته د رسېدو کوښښ وکړي او د جګړې یو بل پړاو پیل شي. هغه همدا راز ویلي که امریکايي عسکر وځي نو ناټو به هم خپل ځواکونه له دغه هېواد وباسي نو ښایي طالبان له خلا په استفادې له افغان حکومت سره جګړې شدیدې کړي. نوموړی ټینګار کوي چې په افغانستان کې له مسایلو سره باید له احتیاط ډک چلند وشي او هر ګام دې په پوره دقت واخیستل شي. هغه هیله څرګنده کړې چې طالبان سولې ته ژمن پاتې شي او په دې توګه په افغانستان کې د اوږدې جګړې ټغر ټول کړي.
